2E26-096 bail Seury/Lebez

Comparurent en leurs psonnes[1] Jean Soeury censsier demt[2] à Eslincourt d'une part et Michel Lebez meulquinier demourant à Clary en Cambrésis d'aultre part, et recognulrent sçavoir led^t premier comparant d'avoir cejourdhuy rendue et bailliez à tiltre de ferme censse et muaige aud^t Michel Lebez seconde comparant lequel at emprin et promis tenir aud^t tiltre pour luy, sa femme et ayans cause toutte cincq boistellée de terres lables[3] séant au terroir dud^t Clary tenant d'une lisière à cincqs mencaudée de Camtinprez occuppé par Nicaise Gransart, d'aultre aulx terres de vefve et hoirs Paul Lempreur et d'un bout à noeufs boistellée Jean Lebez ainsy que lesd^tes cincqs boistellée de terres se comportent et extendent sans aulcune réserva^on pour par led^t preneur, sad^te femme et ayans cause en jouir le temps, terme et espace de six ans continuels et ensuivants l'un l'aultre pour y reprendre deux bleds et deux mars à comencher à entrer en bail doise l'après aoust dernier et labourer en cest pnte[4] année pour faire la première despouille à bled à l'aoust de l'an qu'on dira et contera 1693 et payer le rendaige au jour de S^t André ensuivant, parmy et moyennant que led^t preneur a promis et sera tenu en rendre payer et satisfaire aud^t bailleur sa femme et ayans cause, la cantittée de cincqs mencaud de bled pour tout lesd^ts cincqs boistellé quand elle porteront ou debvront porter bled bon léalle grain bien appointé de van et flael sain et secq livré aud^t Eslincourt et à la messure dud^t lieu, plus sera tenus led^t preneur de bien labourer lesd^tes terres ou faire labourer de toutte roy et saison sans le refroisser ny laisser en riez comme aussy le fumer et amender une fois plainem^nt durant lesd^ts six ans, plus sera encoire tenus led^t preneur descharger lesd^tes cincqs boistellée de terres durant led^t terme de touttes taille, imposition mis sur et à mettre sans diminu^on du rendaige principal. Bien entendue que sy led^t bailleur trouvoit à propos de vendre lesd^tes cincqs boistellée de terres pendant lesd^ts six ans il sera en sa liberté et le podra vendre librem^nt pourveu rendre et restituer aud^t preneur les intérests tant pour lesd^tes amendises que aultres, et sy ne vient à le vendre comme dessus led^t preneur en jouira encoire trois ans après quy sera encoire un bled et un mars au mesme rendaige, charge et conditions que dessus est déclaré, à telle condition que led^t bailleur sera encoire en liberté de le vendre pendant lesd^ts trois ans s'il trouvoit à propos pourveu rendre les intérests des amendisses et aultres aud^t preneur au prorata desd^ts trois ans et ne poldra led^t preneur transporter son droict de ferme ny partie en aultruy sans la permission dud^t bailleur à paine de priva^on du pnt bail ou de ce quy en resteroit à parfaire

Toutte lequel bail à ferme et choses dessus dittes lesd^tes parties respectivem^nt ont promis tenir, entretenir, faire jouir, payer, furnir et acomplir de poinct en poinct sans y contrevenir par les fois et serm^nt de leurs personnes soubz l'obliga^on de leurs biens pnts et futurs sur XXX pats[5] de paine à donner etc... renonchans etc... Faict et passé aud^t Clary pdevant[6] le notte[7] soubsigné et en pnce de Jean Hustin et Jean Villain habitant dud^t lieu, tesm[8] à ce evocquez le jour, mois et an que dessus

Bien entendue que led^t preneur a payez aud^t (mot raturé) bailleur pour le pot de vin du pnt marché la somme de trois florins que led^t bailleur a confessé avoir receu

[1] Pour « personnes ».
[2] Pour « demeurant ».
[3] Pour « labourables ».
[4] Pour « présente ».
[5] Pour « patards ».
[6] Pour « pardevant ».
[7] Pour « notaire ».
[8] Pour « témoins ».