Contrat entre Etienne Lefébure et Mary Lemaire

13 janvier 1684

Du XIII° jour du mois de janvier an mil six cent quattre vingt quattre

Comparurent en leurs personnes Estienne Lefébure en qualité et come mary et bail de Mary Cocquery sa feme demt[1] à Cambray d'une part et Mary Lemaire vefve depuis naguère de feu Simon Cocquery demt à Clary d'aultre part, lesquels comparant de leurs bon gré et sans aulcune constraincte, induction ny séduction recognulrent et déclarèrent que pour le mort et trespas dudt feu Simon Cocquery led^t Estienne Lefébure en sa qualité susd^te avoit droict de prendre en la maison mortuaire dud^t Cocquert sauf le viaige et usurfruict de laditte Mary Lemaire la juste moitié des moeubles avecq la moitié d'un jardin et maison mentionné et porté par leur contract de mariaige aulx charges de payer la moitié des debtes, obsecques et funérailles nonobstant lequel viage que laditte Mary Lemaire avoit droict de jouir de laditte moitié des moeubles et jardin, icelle avecq led^t Lefébure se sont acomodé et convenu cejourd'huy par ensamble en la forme et manière qu'il s'ensuilt, cest assçavoir que laditte Mary Lemaire a promis et sera tenu bailler et livrer aud^t premier comparant pour touttes ses prétentions de laditte maison mortuaire le nombre et cantitté de dix sept bestes blanches à laisne tant mouton que brebis qu'elle luy debvra de livrer le jour qu'on fera les debvoirs de loy de la moitié de jardin cy après mentionné, et ce[2] sans aulcune charge des debtes, obsecques ny funérailles, lesquels icelle Mary Lemaire debvra payer et satisffaire où il appartiendra tellemnt que led^t Lefébure et ses ayans causes n'en soit recherché ny inquiété, en oultre laditte Mary Lemaire a promis de ne plus rien demander aud^t Lefébure et Augustin Bury son beau-fils de ce qu'il luy estoient redevable ains les tient quitte et touttes aultres à tousiours, bien entendue que lesd^tes dix-sept bestes blanches à laisne se debvront prendre dans une quantitté provenant de laditte maison mortuaire au plus esgalles qu'il sera trouvé convenable par des bergers de plus à ce coignoissant parmy et moyennant quoy led^t Estienne Lefébure a vendue, ceddé, quitté et du tout transporté à laditte Mary Lemaire la juste moitié desd^ts jardin et maison qu'elle avoit donné aud^t feu Rocquery son mary contractant son mariaige, à prendre conformément au contract de mariaige, et pour quoy valider icelluy a promis d'en passer les debvoirs de loy luy et sa femme pardevant Mess^rs les prévot et eschevins dud^t Clary à brefs jour, à tout quoy lesd^ts comparans ont promis tenir, entretenir de point en point sans aller au contraire par les fois et serment de leurs psonnes[3] soubz l'obligaon[4] de leurs biens pnt[5] et futurs et sur XXX pat[6] de paine à donner etc... renonchant etc... Et quand à laditte Mary Lemaire après luy avoir donné à entendre icelle a renonché au droict de veillan et à l'autenticq sy qua mullier. Ainsy faict et passé aud^t Clary pardevant le nott[7] soubsigné et en pnce de Hiérosme Bénicourt et Amand Denoyelle habitant desd^ts lieu de Clary et Cambray, tesm[8] à ce requis et appellé le jour, mois et an que dessus. Bien entendue en oultre que laditte Mary Lemaire a déclaré n'avoir aulcun mouton dans les bestes cy dessus mentionné partant led^t Lefébure se debvra contenter des brebis tels qu'elles seront trouvé. Tesm

+ marcq de Estienne Lefébure
+ marcq de Mary Lemaire
Boursiez, 1684, greffier, nott

Ecrit au dos
Contract faict par Etienne Lefébure et Mary Lemaire, 1684

(Source: AD59, Tabellion de Cambrai, 2 E 26 / 96, trancription Marc Maillot)