Partage entre les héritiers de Jonas Boursiez et Mary Leducq

17 mai 1688

Du XVII° jour du mois de may an mil six cent quattre vingt et huict

Comparurent en leurs personnes Jean, Michel et Mathieu Boursiez, frères d'une part, Jacques Rousseau en action et comme mary et bail de Anne Henninot sa femme, Jean Henninot au nom et comme tutteur de Mary et Mary Jenne Henninot, filles mineures de feu Urbain et Barbe Dureulz leur père et mère, et Jean Parent tant en action et comme mary et bail de Mary Henninot sa femme qu'au nom et se portant fort de Piere Quentin Parent son fils encoire à marier, à faire et passer ce que s'ensuilt d'aultre part, lesquels comparant de leurs bonne vollonté et sans aulcune constraincte, recognulrent et déclarèrent que pour esvitter à quelque difigulté que poldroit fondre et arriver entre eulx touchant noeuf mencauldées une pinte et le tierche pintte   (#)  en plusieurs piesches séant au terroir de Clary à eulx tombé et escheulz sçavoir la juste moitié ausd^ts premiers comparans de la sucession de feu Jonas Boursiez leur frère, et l'aultre moitié ausd^tes seconde comparans venant de la sucession de feu Mary Leduc icelle vivant femme aud^t Jonas Boursiez, desquels terres affin qu'ils en puissent jouir de chacun sa part et moitié séparemment ils en ont cejourdhuy faict le partaige et divission entre eulx après lot jetté ainsy et comme s'ensuilt

Et premier

Pour la part et moitié desd^ts Boursiez premier comparants, sont tombée et escheulz, sicomme sept boistellées faisant moitié de trois mencauldées et demy pris desd^tes sept boistellées tenant d'une lisière à trois mencaudées Jean Lefébure, d'aultre aulx aultres sept boistellées cy après déclaré et d'un bout à une mencauldée Noel Leduc, Item la moitié de cincq boistellées nommé le Camp de Salmant tenant à cincq boistellées Blaise Comian, d'aultre à l'aultre pareil moitié et d'un bout au chemin menant dud^t Clary à Buzegny, Item la moitié d'un tierche de trois mencauldées et demy pris tenant à une mencauldée Nicolas Gabet as terres Jean Lefébure, d'aultre à l'aultre pareil moitié cy après déclaré et d'un bout à une rasière dud^t Jean Parent, Item la moitié d'une rasière pris tenant à trois mencauldées de l'église dud^t Clary, d'aultre aulx aultres trois boistellées cy après déclaré et à trois boistellées Jean Leroy, et finallem^nt la moitié de sept boistellées ou environ pris tenant aulx terres des hérittiers Adrien de Bonneville, d'aultre à l'aultre pareil moitié cy après déclaré et d'un bout aulx terres de l'église dud^t Clary

Et pour la part et moitié desd^ts seconde comparant en action et au noms que dessus sont tombé sicomme sept boistellées faisant moitié desd^tes trois mencauldées et demy tenant d'une lisière à quinze mencauldées monsieur du Sartel, d'aultre à l'aultre moitié dessus déclaré et d'un bout à lad^te mencauldée Noel Leduc, Item la moitié de cincq boistellées au Camp de Salmant tenant à l'aultre moitié dessus déclaré, d'aultre à une demy mencauldée Jean Parent et aud^t chemin allant à Buzegny, Item la moitié du tierche de trois boistellées et demy pris tenant au tierche Jérosme Bénicourt, d'aultre à l'aultre pareil moitié dessus déclaré et d'un bout à lad^te rasière dud^t Jean Parent, Item la moitié de la rasière pris tenant aulx terres Eloy Hédiart et Anthoine Millot, d'aultre à l'aultre moitié dessus déclaré et par bas à trois boistellées Jacques Pruvost, et finallem^nt la moitié desd^ts sept boistellées tenant d'une lisière à une mencauldée Jacques Pruvost, d'aultre à l'aultre moitié susd^te et aulx terres de lad^te église

Toutte lequel partaige lesd^tes parties respectivem^nt ont promis de tenir, entretenir, conduire et garandir l’un l'aultre de chacun sa part et moitié sans jamais aller au contraire par les fois et serment de chacun leurs personnes soubz l'obliga^on[1] de leurs biens pnts[2] et futurs sur LX sols de paine à donner etc... renonchans etc... Faict et passé aud^t Clary pardevant le nottaire soubsigné et en pnce de Michel Lebez et Jean Herbécourt tesmoings à ce envocquez le jour, mois et an que dessus. Tesm[3]

J Boursiez
Michel Boursiez
Mathieu Boursiez
Jacq Rousseau
Jean Henninot
Boursiez
Jean Parent
Boursiez, 1688, greffier, nott

Mention marginale
(#) de terres labourables

Ecrit au dos
Partaige entre les hérittiers de Jonas Boursiez et Mary Leducq, 1688

(Source: AD59, Tabellion de Cambrai: 2 E 26 / 96, transcription Marc Maillot)