Partage entre les héritiers de Daniel Millot

6 février 1691

Du VI° jour du mois de fébvrier an 1691

Comparurent en leurs personnes Adrien du Sauchois en quallitée et comme mary et bail de Susanne Millot sa femme, Adrien Millot et Jean Gransart en quallité de Jenne Millot sa femme, et Anthonette Millot encoire à marier demts[1] à Clary en Cambrésis, lesquels de leurs bon grée, pure franche et libéralle vollonté et sans aulcune constraincte, ont dit et déclaré que pour esvitter à quelque difigulté que poldroit soudre et arriver entre eulx touchants deux mencaudé et trois boistellées de terres en deux piesches au terroir dud^t Clary, à eulx dévolus et escheulz tant de la sucession de feu Daniel Millot leur père et mère grand que de celle de Mary Anne Millot fille dud^t Daniel leur soeure et tante, sicomme deux mencaudée vers l'Espinette de Maret tenant en lisière à deux mencaudé Guillaume Leducq, d'aultre lisière à deux mencaudé Paul Lempreur, d'un bout par bas à six mencaudé de l'église dud^t Clary et d'aultre par hault au terroir dud^t Maret, et trois boistellées derière les thieulleris, tenant à la thieullery Paul Lempreur et Toussainct Millot, d'aultre aulx terres de Camtinprez, de tierches sens au jardin et thieullery Daniel Gransart, et au chemin menant dud^t Clary à la censse d'Iry, ainsy quelles lesd^tes terres[2] se comportent et extendent affin que iceulx comparants puissent plus comodém^nt en jouir de chacun sa part par indivy, ils en ont cejourdhuy faict le partaige en la forme et manière que s'ensuilt, c'est assçavoir qu'après lot jettée entre eulx led^t Adrien Du Sauchois en sa quallité susd^te est tombé et escheulz à luy appartient pour sa part une demy mencaudé et les trois cincquiesme partie d'une pinte à prendre dans les deux mencaudée à l'Espinette par bas tenant ausdittes six mencaudéess de lad^te église, et pour la part desd^ts Adrien Millot et Jean Gransart en quallité que dit est, ont et leur appartient une mencaudé une pinte et un cincquiesme de pinte à prendre dans lesd^tes deux mencaudé à eulx deux chacun la moitié esgalle, sçavoir la part et moitié dud^t Adrien Millot pris tenant à la part dud^t Adrien Sauchois cy devant déclaré, et à la part cy après déclaré dud^t Jean Gransart lequel at sad^te part quy est la moitié come dessus allencontre dud^t Adrien et y tenant, et d'aultre part hault aulx six pinttes cy après de lad^te Anthoinette laquelle est tombé et at pour sa part sçavoir lesd^tes six pintes pris dans lesd^tes deux mencaudé tenant à la part précédent et aud^t terroir de Maret, et at encoire icelle Thonnette Millot les[3] trois boistellées dernier déclaré ten^nt ausdittes thieullery, à condition que pour meilleur vaille elle sera tenu bailler et retourner aud^t Adrien Millot un mencaud de bled secqz, toutte lequel partaige et choses dessus dittes lesd^tes parties, comparants ont promis respectivem^nt ont promis tenir entretenir, furnir et acomplir sans y contevenir, soubz l'obliga^on de tous et chacun leurs biens pnts[4] et futurs sur LX sols de paine à donner etc... renonchans etc... Faict et passé aud^t Clary pardevant le notte[5] soubsigné et en pnce de Jacque Prévost, prevost dud^t lieu, Jean Losiau eschevin et Michel Millot, tesm[6] à ce évocqué le jour, mois et an que dessus.

+ marcq Adrien du Sauchois
Adrien Millot
+ marcq Anthonnette Millot
Jean Gransart
Boursiez, 1691, greffier, notte

Ecrit au dos
Partaige faict entre les hérittiers Daniel Millot, 1691

(Source: AD59, Tabellion de Cambrai: 2 E 26 / 96, transcription Marc Maillot)