Partage Paul Lebez et sa femme à leurs enfants

26 janvier 1685

Du XXVI° jour du mois de janvier an mil six cent quattre vingt et cincq

Pardevant Nicolas de Gransart prévost de la terre et Srie de Clary en Cambrésis et pnt[1] comes eschevins dud^t lieu Hiérosme Bénicourt, Jacques Pruvost, Jonas Boursiez et Jean Legrand

Comparurent en leurs psonnes[2] Paul Lebez aussy eschevin dud^t Clary et Laurence Lamouret sa femme conjoints demt[3] aud^t lieu, icelle Laurence estant en son lict malade néant moins en ses bons sens mémoire et entendemnt[4], lesquels de leurs bon grée, pure franche et libéralle volonté sans aulcune constraincte induction ny séduction, laditte femme de sond^t mary auctorisé, disrent recognulrent et déclarèrent que pour après leurs deux décès nourir paix et amitez entre leurs enffans nepveu et niepce et affin desvitter à touttes querelles, procès et inimitiez que poldroient soudre et arriver entre eulx touchant les biens immoeubles à eulx dispozisible ils en ont ordonné dispozé et faict le partaige ainsy et comme s'ensuilt

Et premier

Item qu'ils donnent et ordonnent à Jean et Michel Lebez leurs deux fils touttes leur jardin lieu pourpris et hérittaige contenant une rasière ou environ de terres amazé de maison, chambres, estables, chellieu et grange où ils font leur demeure et résidence aud^t Clary, le divissant pntemnt[5] en deux par lesd^ts donnateurs sçavoir la juste moitié dud^t jardin avecq la moitié de la grange du cotté et tenant en lisière au jardin appellé le jardin Claude appartenant à Paul Lempreur d'aultre à l'aultre pareil moitié ainsy qu'elle est déclaré appartenir aud^t Jean Lebez, et l'aultre moitié avecq la maison, chambres, chellieu et moitié de laditte grange tenant en lisière à aultre jardin dud^t[6] Paul Lempereur et pardevant à la rue Lenglet, pour appartenir propre aud^t Michel Lebez à condition de par icelluy ses hoirs et ayans causes livrer passaige aud^t Jean Lebez et ayans causes, pour aller et venir sur de saditte part aulx waresquau du Sr[7], tant à pied à cheval chariot ou charrette sans aulcun empeschemnt ny contredit, et quand aulx renttes, hipotecques sur toutte led^t hérittaige tant Srialle[8] qu'à nouvelle charge demoureront à la charge desd^ts Jean et Michel Lebez, aultant l'un que l'aultre par esgalle portion

Item donnent encoire aud^t Jean Lebez onze boistellées de terres lables[9] sur le terroir dud^t Clary tenant ? d'un sens aulx terres et marché de la Sottière, d'aultre aulx terres Jonas Boursiez, d'un bout aulx terres Toussainct Levecq et d'aultre à deux mencaudée et demy monsr du Mont occuppé par Jean Gransar

Item donnent et ordonnent encoire aud^t Michel Lebez deux mencaudées ou environ de terres aussy lables situé sur led^t terroir tenant d'une part à quatre mencaudées Michel Boursiez à cause de sa femme et de touts aultres sens aulx terres de Camtinprée occuppé par Nicolas Dubois et la vefve Michel de Gransart

Item que lesd^ts donatteurs ont ordonné et ainsy est leur volonté, le cas arrivant que l'une ou l'aultre desd^tes deux piesche de terre cy devant et déclaré donné ausd^ts Jean et Michel Lebez, venoit à estre advestus en bled au jour du décès du dernier vivant d'eulx deux, veultent et entendent que lesd^tes advestures se despouillent par esgalles portion sans que celluy à quy que ce seroit la piesche de terres de laditte advesture ne prétendre aulcune chose contre l'aultre

Bien entendue que lesd^ts donatteurs contractant le mariaige de feu Michelle Lebez leur fille avecq Nicolas Gabet, ils luy auroient donné pour l'advanchemnt de son mariaige la troixiesme partie du jardin et hérittaige dessus déclaré et donné ausd^ts Jean et Michel Lebez, laquelle donnaon[10] dud^t advanchemnt de mariaige lesd^ts donatteurs en font révocaon[11] au moyen de la récompense qu'ils font par ce pnt partaige à Jean et Mary Gabet leurs nepveu et niepce, et enffans de laditte Michelle leur fille et venant à laditte récompense au lieu de saditte troixiesme partie d'héritaige lesd^ts donatteurs ont donné et ordonnent ausd^ts Jean et Mary Gabet leursd^ts nepveu et niepce toutte une mencaudée et dix sept verges faisant le tiers de trois mencaudées et demy tent[12] d'une lisière à pareil tierche de la vefve et hoirs Andreu Anselme, d'aultre aulx terres Jonas Boursiez et Pierre Henninot et d'un bout à une razière de la cure dud^t Clary

Item donnent encoire aud^t Jean Gabet une rasière de terres vers le mollin dud^t Clary icelle situé sur le terroir de Montegny tenant à trois mencaudées du Chappre Nostre Dame, d'aultre à cincq boistellées de la vefve et hoirs Gramet Millot, d'un bout à deux mencd et demy des hérittiers Anthoine Lefébure et aulx terres Eloy Hédiart

Item donnent aussy à laditte Mary Gabet feme pntemnt à Jean Quarré une rasière de terres aussy lables situé sur led^t terroir de Clary tenant à une rasière la vefve et hoirs Piere Millot, d'aultre à une rasière Jean Millot, d'un bout aulx terres Jean Losiau et d'aultre aulx terres Jean Lefébure

Item que lesd^ts donatteurs ont faict lesd^ts telle donnation à telle fin qu'ils se sont réservé tant conjointemnt que séparémnt[13] de pouvoir prendre franchemnt la somme de cent florins sur tout lesd^tes terres lables et ce en cas qu'ils en auroient besoins et affaire pour leurs entretien

Pour tous lesquels donnations valloir et porter plain et enthier effect à tousiours lesd^ts comparans donatteurs de leurs bon grée et _____ come dessus misrent werpirent et rapportèrent en la main dud^t de Gransart prévost come en la main du Sr et de justice en pnce[14] desd^ts eschevins bien et à loy, tous lesd^tes parties de jardin amazemnt[15] et terres lables dessus déclarée aussy bien sur le terroir dud^t Clary que sur celluy de Montegny et s'en sont désaissis, dévestus et désheritté par verge et par baston perpétuellemnt et à tousiours pour par lesd^ts donattaires, leurs hoirs et ayans causes jouir, user et profficter de chacun sa part assigné cy desssus come de leur propre bien et vray donation à tousiours, à la charge touttefois du viaige et usurfruict desd^ts donatteurs et ausy des renttes cy dessus mentionné[16] et d'aultres redevanches anciennes et accoustumées que lesd^ts jardins et terres doibtent ou peultent debvoir chacun pour son particullier, ce fut ainsy faict et passé aud^t Clary pardevant les susnommés prévost et eschevins le jour, mois et an susdit Tesm[17]

Nicolab Gransar, preuvost
Jean Loseau
+ marcq Jonas Boursiez
Jacques Prévost
Jérosme Bagnicourt, 1685
Boursiez, 1685, greffier, not

Ecrit au dos
Partaige faict par Paul Lebez et sa femme à leurs enffans, 1685

(Source: AD59, Tabellion de Cambrai: 2 E 26 / 96, transcription Marc Maillot)