Partage entre Jean-Baptiste Lentier et Noel Pruvost et consors

17 mai 1691

Du XVII° jour du mois de may an 1691

Comparurent en leurs personnes Jean-Baptiste Lentier en action et comme mary et bail de Anne Pruvost sa femme demts[1] à Clary et Noel Pruvost encoire à marier demt aud^t lieu, iceulx Pruvost enfans et hérittiers de feu Jean Pruvost et Michelle Gave encoire vivante[2] leurs père et mère, lesquels comparans de leurs bon grée ont dit et déclaré que pour esvitter à quelque difigulté que poldroit soudre et ariver entre eulx touchant un certain jardin et héritaige cy après déclaré séant aud^t Clary contenant une mencaudé moins trois verge à eulx appartenant tenant d'une lisière au jardin Toussainct Chartier à cause de sa feme, d'aultre au jardin Anne Asselin, d'un bout au jardin Maximilien Robace et pardevant à la grand rue des thieullery menant à Prémont, lequel jardin pour leur plus grande comodité notament à raison que led^t Jean-Baptiste Lentier veult faire ériger une maison pour y demourer sur sa part, ils en ont cejourdhuy faict le partaige par ensemble par l'adveu et consentem^nt de lad^te Michelle Gave leurditte mère et belle-mère respectivem^nt icy ausy pnte[3] et comparante, lequel partaige et divission at esté faict en la forme et manière suivante, c'est assçavoir que led^t Jean-Baptiste Lentier en action et an nom de sad^te feme est tombé et escheulz à la moitié dud^t jardin quy est sa part pris au loingt et tenant au jardin dud^t Chartier et d'aultre à l'aultre moitié dud^t jardin cy après déclaré, à condition que pour meilleur vaille de lad^te moitié laquelle est plus propre et vaillable que l'aultre moitié, et pourquoy led^t Jean-Baptiste Lenthier au nom que dit est at bailliez, ceddée et transporté aud^t Noel Pruvost toutte une pintte et demie de terres lables[4] à prendre et faisant moitié de trois pinttes allencontre dud^t Noel qu'il a l'ault. moitié par ainsy tous lesd^tes trois pinttes luy appartient, tenant à trois boistellées ou environ de Jean Lebez, d'aultre à une mencaudé Jérosme Bugnicourt et à noeuf boistellées de la cure de Montegny, Item at encoire led^t Noel Pruvost en sa part l'aultre moitié dud^t jardin ten^nt à la moitié précédent d'une lisière d'aultre aud^t jardin Anne Asselin sur laquelle moitié come il y at des arbres tant pouppeliers que aultres iceulx comparans sont convenus et acordé que lesd^ts arbres se debvront partaiger entre eulx par esgalle portion et que led^t Lenthier poldra prendre et abbattre sa part et moitié d'iceulx quand bon luy semblera sans pour led^t Noel Pruvost luy donner aulcun empechem^nt, Bien entendue qu'au desrend d'entre led^t jardin et le jardin susd^t dud^t Chartier il ne s'est trouvé aulcune borne, mais bien ont dit et déclaré come ausy led^t Toussainct Chartier icy ausy pnt et comparant aud^t partaige au nom de Jenne Millot sa feme d'avoir faict desrend à une chocque[5] et habots de chesne à la haye au loing du jardin dud^t Robache, et de là allant droict à un ch chesne quy est de la haye au loing de lad^te grand lequel chesne demoura aud^t Jean-Baptiste Lenthier quy poldra la coupper et abbattre moyennant y laisser un pied et chocque quy servira de borne de la haye faisant divission contre le jardin dud^t Robache, le toutte ainsy et[6] come ils en ont jouiy  passé loing temps et qu'ils jouiront doresnavant sans aller au contraire,

Toutte lequel partaige et choses susd^tes lesd^ts comparans respectivem^nt l'ont ainsy advoué et promis tenir, entretenir sans y contrevenir, par les fois et serment de leurs personnes soub l'obliga^on de tous et chacun leurs biens pnt et à venir sur XXX pats[7] de paine à donner etc... renonchans etc... Faict et passé aud^t Clary pardevant le notte soubsigné et en pnce de Jean Lebez et Anthoine Gabet tesm[8] tesm à ce evocquez le jour mois et an que dessus: Bien entendue que lad^te Michelle Gave a déclaré d'avoir achepté le susd^t jardin en sa viduicté saulf une petitte portion acquis auparavant par led^t feu Jean Pruvost son marit, laquelle entend et veult estre libre de jouir sa vie durant de sa part et moitié dud^t jardin d'icelluy Noel Pruvost son fils et mesme en cas qu'elle en auroit besoing pour subvenir à ses nécesité, elle réserve ausy de le pouvoir vendre et faire son proffict

Jean-Batiss Leantié
+ marcq Michelle Gave
+ marcq Noel Pruvost
Toussaint Chartiez
Boursiez, 1691, greffier, notte

Ecrit au dos
Partaige faict entre Jean-Baptiste Lentier et Noel Pruvost et consors, 1691

(Source: AD59, Tabellion de Cambrai: 2 E 26 / 96, transcription Marc Maillot)