2E26-096 partage Millot/Boursier/Du Moustier

Comparurent en leurs propre personnes Toussainct Millot mary et bail de Mary Bricoult, Daniel Boursiez aussy mary et bail de Jenne Bricoult et Nicaise du Moustieu mary et bail de Mary Michelle Bourlé tous demeurant à Clary, lesquels de leurs bon grez pure franche et libéralle volonté et sans constraincte, disrent, recognulrent et déclarèrent qu’après le décès et trespas de Jeanna Massel leur belle-mère leur[1] compette et appartient en action de chacun leurd^te femes certain jardin lieu pourpris et hérittaige content[2] cincq boistellé et une pinte de terre amazé de maison chambre fourny estables et chellieu situé aud^t Clary tenant d’une lisière au jardin Jacque Parent, d’aultre lisière à un jardin Michel Millot, d’un bout au jardin Jean Méreau l’aisné et pardevant à la grande rue allant aulx thieullery de la Motte, toutte ainsy que led^t jardin et amazemnt[3] se comportent et extendent. Il est à partaiger en trois part et portion dont lesd^ts Toussainct Millot at et aura en sa part cincq pinttes et demy et deux verge tant de patrimoine que d’acquest qu’il en at faict cejourd’huy à Renon Bourlé et sa femme, Item led^t Daniel Boursiez une boistellée et demy _____ et une verge, et led^t Nicaise du Moustieu la juste moitié de toutte icelluy jardin et bastiment selon que sera cy après spécifiez, tant d’acquest par luy faict à Jérosme et Jean Bricoult que de patrimoine de lad^te Mary Michelle sa feme, pourquoy et affin d’évitter à touttes querelles procès et inimitié que poldroit cy après fondre et arriver entre eulx touchant led^t jardin notament affin que l’un et chacun d’eulx puissent plus comodément jouir et posseder de sa part par indivis après le décès susd^t et pour doresnavant satisfaire cy après à l’entretenemnt de chacun sa part desd^ts bastimens, ils en ont cejourd’huy faict le partaige et divission par ensemble en la forme et mainière que s’ensuilt, c’est à ssçavoir qu’après l’un jetté entre eulx, led^t Toussainct Millot est tombé et escheulz à prendre sa part au loingt du jardin Jacques Parent et ce avecq lad^te estable y érigé tenant à la maison et part dud^t Boursiez cy après déclaré, à condition de livrer passaige aud^t Daniel Boursiez et ayans causes ou aultres qu’il appartiendra pour passer, aller et venir depuis saditte part jusque à sad^te grande rue, et ce à pied, à cheval chariot et charrette

Item pour la part dud^t Daniel Boursiez lequel est tombé à la maison et la juste moitié du chellieu quy est dessous la chambre cy après allencontre dud^t Moustieu avecq sa part dud^t jardin tenant à la part dud^t Millot et à la part dud^t Moustieu, dont et dans laquelle maison il y at un four la geulle duquel est pardans lad^te chambre, il a esté convenu que led^t Boursiez poldra boucher lad^te geulle et en faire une pardedant lad^te maison sans contredit ny empeschemnt dud^t Moustieu ou ayans cause

Et pour la part dud^t ______ du Moustieu quy est la juste moitié come dict est lequel est tombé et escheuz à prendre au long dud^t jardin Michel Millot avecq le fourny chambre ___ et la moitié de lad^te cave et chellieu y érigé et tent[4] d’aultre part à la part dud^t Boursiez, à la charge et condition de retourner et payer en une seule fois aud^t Toussainct Millot et ayans cause pour la mieux vaille que sa part la somme de quinze patacons monnoy de Cambrésis

Bien entendu que suivant l’achapt de la part dud^t Renon Bourlé faict par led^t Toussainct Millot il luy touchoit quelque part desd^ts bastimens à l’advant du jardinaige quy estoit sa part il at esté convenu entre lesd^ts partaigeurs affin de ne divisser chacune plache desd^ts bastimens qu’iceulx bastimens seront prise et estimé pour à cest afin que led^t Toussainct Millot soit remply et satisfaict en argent de ce quyl luy poldra toucher à raison de la part de bastimens dud^t Bourlé susd^t, en oultre s’il arrivoit intérest à l’un ou l’aultre desd^ts partaigeur à raison desd^ts bastimens, par la négligence de l’un d’iceulx, l’interest debvra estre satisfaict par celluy quy sera négligent au proffict de l’intéressé

Toutte lequel partaige et chose dessus ditte lesd^ts comparans respectivemnt ont promis tenir entretenir laisser et faire jouir l’un l’aultre de chacun sa part sans y contrevenir à la charge de chacun sa part de rentte tant Sgrialle[5] qu’à nouvelle charge que doibtent ou ~~pouldera~~ poulderont[6] debvoir à l’advenant de ce qu’il ont de jardinaige et bastimens dessus déclaré, par les fois et serment de chacun leurs personnes et de tous leurs biens meubles et immeubles pnt[7] et avenir et sur XXX pat.[8] de paine à donner etc... renonchans etc... Faict et passé aud^t Clary pardevant le nott[9] soubsigné et en pnce[10] de Nicolas de Gransart prévost et Jean Leroy habitant dud^t lieu tesms[11] à ce requis et appellé le jour mois et an que dessus

Bien entendu en oultre qu’au regard du chellieu appartant aud^ts Boursiez et Moustieu il at esté convenu entre eulx que pour leur plus grand proffict de faire faire ensamble un mur dans led^t chellieu pour faire la séparation de chacun leur moitié et les frais qu’il conviendra y exposer se debvront advancher et payer comunémnt[12] entr eulx aultant l’un que l’aultre

Le jour et an susd^t lesd^ts comparans comparchonniers de leurs bon gré come dessus ont déclaré par cest pnt acte qu’ils donnent pouvoir à lad^te Jenne Massel leur belle-mère de vendre ou rapporter pour tel pris qu’elle trouvera convenir cincq boistellé de terre lables[13] tent au grand marché d’Iry et aulx terres de l’église dud^t Clary à icelle appartent d’acquest qu’elle en a faict avecq feu[14] Jean Bricoult son premier mary et ce en cas de besoin et nécésité promettant par iceulx comparans de ne luy donner empeschemnt pour ce faire ains touttes pouvoir et auctorité sans y contrebvenir à quoy il se sont obligé tant pour eulx que pour leur feme sur la mesme paine que dessus in forma déclarans leur signatture sus apposé vaillable pour l’effect de lad^te acte, tesme

Ecrit au dos : Partaige faict entre Toussainct Millot, Daniel Boursiez et Nicaise Moustieu d’un jardin et bastiment venant de chacun leur femme et d’acquest, 1683

[1] Ce mot est interligné.
[2] Abréviation pour « contenant ».
[3] Pour « amazement ».
[4] Pour « tenant ».
[5] Pour « seigneuriale ».
[6] Ce mot est interligné.
[7] Abréviation pour « présents ».
[8] Abréviation de « patards ».
[9] Abréviation pour « notaire ».
[10] Pour « présence ».
[11] Pour « témoins ».
[12] Pour « communément ».
[13] Pour « labourables ».
[14] Ce mot est interligné.