Partage entre Jean Montay et Joseph Gransart

30 septembre 1680

Du dernier jour du mois de septembre mil six cent et huictante

Comparurent personnellemnt Jean de Montay mary et baille d’Anne Millot et Joseph de Gransart aussy mary et bail de Mary Millot sa femme, icelles Millot fille héritière à proportion desd^ts feus Abraham Millot et de Susanne Millot leurs père et mère quy furent conjoints demourant à Clary, lesquels de leurs bon grez ont dit et déclaré que pour esviter à bout difigulté et procès que poldroit fondre et arriver entre eulx touchant une chambre fourny brassery et une part de jardin, lieu pourpry et héritaige situé audt Clary à eulx escheu (#) de la succession de laditte Suzanne Millot leur belle-mère, tenant d’une part au jardin appellé le Jardin Tayon, d’aultre à aultre part du mesme jardin appartenant à Philippe Taisne (*), d’un bout aulx champs aux terres Michel Boursiez et pardevant à la rue du Mollin, desquels parties de maison chambre fourny et brassery dessus déclaré avecq laditte part de jardin, iceulx comparans en ont cejourd’huy faict le partaige et divission affin que chacun d’eulx en puissent plus comodément jouir de sa part par indivy, le tout sans fraude ny fourclusion après ___ telle ainsy et come s’ensuilt

Et premier

Pour la part dud^t Jean de Montay et action que dessus est tombé et escheubz à laditte chambre dessus déclaré tenant à la maison appartenant aud^t Phles[1] Taisne avecq la quattriesme partie de certaine cave desoubz laditte chambre à prendre au loingt du contrequen de lad^te maison et chambre et la juste moitié de laditte parte de jardin à prendre aussy au loingt de la parte dud^t Phles Taisne avecq mesme largeur de gasonnaige et devanture que la part dud^t Joseph Gransart cy après déclaré à la charge et condition de ne point empêcher led^t de Gransart ou ses ayans causes d’aller et venir au puis de l’eau qui est sur la parte dud^t Phles Taisne, conformément au partaige de tout leur jardin cy devant faict avecq led^t Taisne

Et pour la part dud^t Joseph de Gransart et action que dessus est tombé et escheubz à l’aultre part dud^t jardin portant mesme longueur et largeur de gason et devanture que la précédente, avecq laditte brassery fourny, quattriesme parties de lad^te cavée à prendre de son cotté tenant au Jardin Tayon et à la part précédent et come toutte lad^te brassery et led^t jardin Tayon il y a instance pour aller et venir avecq chariots et aultres ustensil laquel instance demourera comand entre iceulx conparchonniers de leurs ayans causes à condition aussy que led^t de Gransart sera obligé de laisser passer et rappasser led^t de Montay ou ses ayans causes sur saditte part pour aller et venir (¤) à la sienne avecq chariots et aultres usages. En oultre aussy de ne point empêcher de passer en ladite cour pour aller à laditte rue du Molin, conformément (un mot barré) aud^t partaige cy devant faict avecq led^t Phles Taisne (&) Toutte lequelle partaige et chosse dessus dittes lesd^ts comparans respectivemnt ont promis de tenir et entretenir tout ce que dessus sans aller au contraire, à la charge de chacun sa part de renttes sgnrialles[2] anchienne et acoustumée à condition aussy de ne point empêcher le tour de l’échelle l’un à l’aultre pour couvrir lesd^ts bastimens, come aussy de ne point bastir l’un l’aultre sur la devanture desd^ts bastimens craindant d’empêcher la clairté de chacun leur part de laditte cave, à tout quoy lesd^ts comparans se sont obligez et de garandir l’un l’aultre en cedit partaige par la foy et sermen de leurs personnes soubz l’obligation de leurs biens meubles et immeubles pnt[3] et à venir sur XXX pats de paine à donner etc... renonchans etc... Faict et passé aud^t Clary pardevant le nott[4] soubsigné et en pnce de Jean Millot et Jean Lebez habitant dud^t Clary tesms[5] à ce requis et appellés le jour mois et an cy dessus

Jean Montay
Joseph Gransar
Boursiez, 1682, greffier nott

Mentions marginales :
(#) à cause de leur feme.
(¤) de laditte terre qu’il at audt bastimens
(&) et come ledt de Gransart at plus de terres en sesdts bastimens que ledt de Montay le passaige qu’il laisse sur saditte part et en récompensse dudt advantaige

Au dos est écrit : Partaige d’une part de jardin avecq des bastimens faict entre Jean de Montay et Joseph de Gransar, 1680

(Source : AD59, Tabellion de Cambrai, 2 E 26 / 96, transcription Marc Maillot )