2E26-096 partage Paul/Rocquez

Comparurent en leurs personnes Adrien Rocquiez en action et comme mary et bail de Barbe Carpentier sa femme demt[1] à Clary en Cambrésis, Piere Paul ausy en action de Claudine de Noyelle sa femme demt aud^t lieu, icelle Claudine ayant le droict ceddée pour donation à elle faict de la moitié de jardin et rasière de terres lables[2] cy après déclaré, par Daniel de Noyelle et Mary Carpentier ses père et mère, lesdittes Barbe et Mary Carpentier fille et hérittiers de feu Jacque Carpentier et Jenne Pluchart leurs père et mère quy furent conjoints demourant aud^t Clary, lesquels comparans de leurs bonne vollonté et sans aulcune constraincte ont dit et déclaré que pour esvitter à quelque difigulté et procès que poldroit soudre et ariver entre eulx touchant certain jardin et héritaige avecq une rasière de terres lables joindans ensamble séant aud^t Clary qu'ils ont à eulx appartenant venant de la sucession dud^t Jacque Carpentier et de lad^te Jenne Pluchart, tenant led^t jardin et rasière de terres d'une lisière au jardin et deux mencaudés de terres lables Jacque Pruvost, d'aultre lisière à la ruelle Disme et à un prez des hérittiers Jean Parent, d'un bout à cincq boistellées Simonne Le Roye, et pardevant à la plache de devant l'église dud^t lieu, lequel jardin et rasière de terres ainsy qu'il se comportent et extendent, ils en ont cejourdhuy faict le partaige entre eulx pour affin que l'un et chacun d'eulx puis plus comodément jouir et poseder de sa part par indivy après lot jettée ainsy et comme s'ensuilt,

C'est assçavoir que led^t Adrien Rocquiez en action que dit est at pour sa part et est tombée à la moitié dud^t jardin et rasière de terres à prendre du cottée et tenant au jardin et terres lables dud^t Jacque Pruvost, et pour la part dud^t Piere Paul en action de lad^te Claudine sa femme icelle ayant le droict ceddée come dessus de sesd^ts père et mère de l'aultre moitié dud^t héritaige et moitié de lad^te rasière de terres à prendre est tombé du cotté d'en bas tenant de lisière à lad^te ruelle Disme et pretz desd^ts hérittiers Jean Parent à condition qu'il sera tenu led^t Piere Paul pour mieux vail de sa part retourner et a promis payer aud^t Adrien Rocquiez la somme de vingt quattre florins monnoy de Flandre, sçavoir la moitié prestement et l'aultre moitié pour l'accomplissement de lad^te somme au jour de S^t Rémy prochain venant de cest pnte année 1691 parmy quoy led^t Piere Paul at le corps de sa maison et hailliers joindans ensamble pntem^nt sur la part dud^t Rocquiez que led^t Piere Paul poura librem^nt prendre et faire démonter en cest pnte année avecq les matériaulx y servant saufz les aultres matériaulx quy seront au devant de lad^te maison et ceulx quy se trouveront dailleur ne servant pas à lad^te maison demouront aud^t Rocquiez à condition ausy d'avoir aultant d'issue l'un que l'autre dud^t jardin pardevant la plache de lad^te église, et pardevant come se poldra trouver à droicteur par l'arpentaige qu'il s'en fera, bien entendue que led^t Piere Paul sera tenu livrer passaige aud^t Adrien Rocquiez et ayans causes sur le debout de sad^te moitié de rasière de terres joindans led^t héritaige, pour charier tant fumier que les despouilles de laditte aultre[3] moitié de rasière de terres dessus déclaré, et les advestures pntem^nt croissant sur icelle rasière de terres se partaigeront à la jarbée entre eulx à l'aoust prochain venant

Toutte lequel partaige et choses dittes lesd^ts comparans respectivem^nt ont promis tenir, entretenir, faire valloir et garandir l'un l'aultre à la charge de chacun la moitié des renttes tant Srialles[4] que aultres sy aulcune en sont deubz le toutte sans y contrevenir par les fois et serment de leurs personnes soubz l'obliga^on de leurs biens pnt et futur sur XXX pats[5] de paine à donner etc... renonchans etc... Faict et passé aud^t Clary pardevant le notte[6] soubsigné et en pnce de Nicolas Gransart et Jean Leroy tesm[7] à ce évocqué le jour mois et an que dessus

+ marcq Adrien Rocquiez
+ Piere Paul
Nicolas Gransar, témoin
Jean Leroy, témoin
Boursiez, 1691, greff. Notte

Ce mesme jour et à l'instant led^t Adrien Adrien Rocquiez a receu dud^t Piere Paul douze florins à bon compte et pour le premier payem^nt cy dessus dessus, et du depuis le dernier jour du mois de 7bre 1691 led^t Adrien Rocquiez a confessé Rémy cy dessus mentionné, dont et de laquelle somme de vingt quattre florins en deux payem^nt led^t Rocquiez s'en est tenus pour comptent et bien payez et en at quittée et quitte led^t Piere Paul, sa feme et ayans causes à tousiours, le tout à raison du retour mentionné aud^t partaige. Faict aud^t Clary pardevant le nottaire soubsigné le jour, mois et an susd^ts en foy de quoy led^t Rocquiez a signé

Ecrit au dos
Partaige d'un jardin et une rasière de terres lables, faict par Piere Paul et Adrien Rocquiez, 1691

[1] Pour « demeurant ».
[2] Pour « labourables ».
[3] Ce mot est interligné. (M. M.)
[4] Pour « seigneuriales ».
[5] Pour « patards ».
[6] Pour « notaire ».
[7] Pour « témoins ».